? Bozan barmy

Bozan barmy?

Habar beriň, eý ýaranlar,

Ýazylany bozan barmy?

Söwdüginden aýrylanlar,

Pyrkatyna dözen barmy?

Aşyklar gaçmaz adyndan,

Ýatmaz iller perýadyndan,

Perhat kimin yşk odundan

Gara dagy gazan barmy?

Gähi-gähi gaýnap joşup,

Kaknus kibi köýüp-bişip,

Ýary bilen başyn goşup,

Hemdem bolup gezen barmy?

Altmyşdan agansoň saly,

Galmaz köňlünde hyýaly,

Diýr Mätäji, meniň ýaly,

Ýardan köňlün üzen barmy?

Türkmen şahyry: Mätäji مأتأجی