Dişleriňe

Dişleriňe

Nägehandan gözüm düşdi

Lebiň bilen dişleriňe:

Ýöriberdik, ýürek joşdy,

Talwas edip gaşlaryňa.

Günde görnüşe geleýdim,

Ýüzünden posa alaýdym,

Gündiz pikriň men bolaýdym,

Gije girip düýşleriňe.

Ilki agşam içeli şerap,

Dalaşaly oýun gurap,

Daňdan turup zülpüň darap,

Timar bergin saçlaryňa.

Jem bolanda gelin-gyzlar,

Seniň tarypyňy sözlär,

Eli çeper hünerbazlar

Degmez eden işleriňe.

Halaýyk haýran oýnuňa,

Golum bukawly boýnuňa,

Mätäjini sal goýnuňa,

Teňňe dakyp döşleriňe.

Türkmen şahyry: Mätäji مأتأجی