Gerekdir

Gerekdir

Ata çykan aňly bolsa her ýoldan,

Berimli, pähimli hany gerekdir;

Ýaranlar ýörise sagyndan-soldan,

Görogly beg kimin syny gerekdir.

Ýow ýolugyp, ýowuz myltyk atylsa,

Kimi ölüp, kimseleri tutulsa,

Gylyç syryp, bir-birewge gatylsa,

Jöwher kulah, demir dony gerekdir.

Meýdan era jeňňi-maglub gaýrylsa,

Agdarlyşyp, arap atlar maýrylsa,

Toç ýigitler ters söweşip aýrylsa,

Jyzasynda gyrmyz gany gerekdir.

Är bolajak ar üstünde çapylsa,

Wadasynda-ykrarynda tapylsa,

Gähi-gähi däri-derman sepilse,

Bedeninde tyg nyşany gerekdir.

At gerek gaçmaga, kowsa ýetmäge,

Garylyp ganyma zeper etmäge,

Märekede diýen sözi bitmäge

Etrapynda ýeňi-ýany gerekdir.

Ýigrimä, otuza ýetende saly,

Serpilmez serinden sed müň hyýaly,

Meger bolaý diýse Hatam Taý ýaly,

Egsilmeýän genji-käni gerekdir.

Habar ber, Jemşid-u Şabähram kany?

Olary ýuwdandyr ýalançy-pany,

Jahanda jem bolsa maslahat güni,

Danyşanda hoş zybany gerekdir.

Han ýanynda ekram bilen otursa,

Gelgeninde halat-serpaý getirse,

Ýalançyny abraý birle ötürse,

Ahyretde nur-imany gerekdir.

Gözüň ýumup girseň umman düýbüne,

Ýagşy ýigit meňzär rahmet ýabyna,

Mätäji diýr, myhman gelse babyna,

Är daýaly, ak juwany gerekdir.

Türkmen şahyry: Mätäji مأتأجی